Mi tin e don di Spirito Santo

Serca nos Dios ta obrando di formanan nobo y lo ta un pica pa no comparti. E ultimo aña hopi cos a pasa. Incluyendo un movecion fuerte den mi spirito pa buska Dios. Asina mi ta wak e trabou (na Post) cu Dios a prove como e tool di Dios pa saka mi foi cama mainta trempan, pa pone e incietitud den mi pa hasi oracion den e oraney di mainta y pa uza e tempo despues di trabou na forma sabio. Naturalmente e proceso no a bai zak zak. Na varios ocacion mi a dual riba Internet (e.o. Facebook) perdiendo tempo na coi "loco". Conviccion semper a trece mi bek te na e punto di un breakthrough. Asina varios hende a draag bij un steentje, ironeamente tambe algun hende cu mi a topa despues di hooopi aña bek riba Facebook. Enfin, Dios di manera nan supernatural tambe a revela mi varios cos. Y a costa mi tin biaha hopi esfuerso y lagrima pa laga los. Den soño y vision Dios a papia cu mi. A stir up mi Spirito di tal forma cu solamente a keda pa obedece. Mi no ta eynan ainda. Mi sa cu mi tin un longway mi dilanti, pero mi a cuminsa dal stapnan den fe!Asina mi mester a trece na e altar di ofrenda amigonan cu mi ta stima mas cu mi mes tawata realisa. Den un soño Dios a mustra mi sin duda algun cu mi omgeving ta stroba mi di crece (cu un mata bon cuida, pero situa den un kamber scur). Tambe pa medio di e palabra a pone un conviccion riba mi cu e.o. versiculo manera 1 Thess. 5:19, 2 Tim. 3:14, Hechos 2:38No ta cu mi a backslide. Semper mi a keda fiel. Meskos cu tur Cristian mi tambe tin mi luchanan. Pero Dios sa cu mi tin temor di Dje y amor pe. Toch como miembro di e iglesia caminda nos a sirbi, mi a limita Dios den hopi cos. Y asina ta culpabel di a paga e Spirito. Te na e punto di a funciona djis pa funciona. A traha djis dor di wak e necesidat, sin tin e "jamada" of porta mihor bisa, sin a wordo aparta pa e trabou cu mi tawata hasiendo. Y por lo tanto faltando e uncion pa por hasi e tarea. Tur esaki a laga mi jega na un punto caminda mi NO tawata por mas. Drained, dragged... bashi. Akinan Jesus a topa cu mi y den mi affliccion e la aserkami. Den mi desesperacion e la afirmami y a lanta mi pa mi no wordo destrui.Porta bo ta lesa e nota aki y bo ta pensa... wel, wel. Mi sa... mi tawata bishita sirbishi regularmente, tawata sirbi cu e donnan y talentonan cu Dios a duna mi y pa ta honesto semper a aprecia di por tin un congregacion cu hendenan cu kende nos ta comprondenos bon y ta amigonan stima. Pero conoce e palabra di Dios no ta tur cos. Nos mester conoce tambe e PODER di Dios. Y e poder di Dios nos por conoce solamente ora nos duna espacio na e Spirito Santo di Dios, ja cu e ta e manisfestacion di e poder di Dios. Juan Bautista a bautisa cu awa, ma a bisa cu esun cu bin despues di dje lo bautisa cu Spirito y esey Jesus ta hasi pa nos ora nos arepenti, laga nos mes wordo bautisa (cu awa como testimonio di nos bida nobo). Jesus mes ta bautisa nos cu e bautiso di e Spirito Santo. Asina den Hecho 1:8 ta skirbi cu nos lo risibi poder ora e Spirito Santo bin riba nos y nos lo ta testigonan di Jesus te na e finnan di mundo!Asina Dios a mustra mi cu tur conocemento no mester ta solamente conocemento logico (den nos cabes) sino e conocemento aki mester transforma den revelacion y baha pa nos curason. Solamente ora nos cuminsa scrudiña e palabra cu nos curason (no solamente cu detallenan historico) e ora nos ta duna libertad na e Spirito Santo di Dios kende na su turno ta revela nos e misterionan di Dios.Asina Dios a bin ta ministra na mi. A bin ta renoba mi pensamento. A mustra mi cuanto biaha mi a compromise, a nenga, a sconde... y a hasi e Spirito Santo dolor. 7 aña na iglesia, semper cu mi a testifica, mi a tene hopi cuidou pa keda den e doctrina. Pa no ofende ningun hende. Hopi biaha ni a durf bisa algo (sabiendo mihor - of cu revelacion spiritual) paso mi sa con nan ta pensa. Y conoce nan theologia. Mi ta culpabel. Y mi ta pidi Dios pordon. E versiculo di Mateo 5:9 a encurasha mi e dianan aki, ora cu satanas cu su mentiranan a purba kibra mi y purba di kita fo'i mi locual Dios ta dunando mi. E versiculo ta bisa cu bendiciona ta esunnan cu ta hasi pas, pasobra nan lo wordo jama yiunan di Dios. Y riba e versiculo aki mi ta steun. Cu mi bida y mi actonan cu mi a hasi den amor, sirbi como testimonio bibo.Siman pasa mi a duna cuenta. Mi a sali for di mi kashi (my closeth) y a testifica cu mi ta jena cu e Spirito Santo. Cu mi tin e don di lenga. Y cu Dios a papia cu mi den soño y a duna mi vision. Pa gracia di Dios mi palabranan a wordo acepta y ningun hende a cuestiona cu locual mi ta papiando berdaderamente ta di Dios. Of si berdaderamente ta Dios ta esun cu ta mustrami of duna mi e soño. Sino humildemente mi desicion di tuma un stap di fe y cambia mi omgeving a wordo respeta y mi te hasta a ricibi e deseonan pa Dios bendiciona mi den e paso cu mi ta tuma.Mi a jora lagrimanan. Dios ta mi testigo, ora mi a realisa mi perdida. Ora mi a realisa cu tumando e paso di fe aki, ta costami "mi cas", mi rumannan cu mi ta stima, mi amiganan. Relacionnan den cual asina hopi a ser inverti. Mi ta move y no sa kiko Dios tin dilanti pa mi. E no a mustra mi tur cos. Mientras e olanan ta halto y e bientonan ta supla, no ta keda mi otro, sino tene mi frenta na halto y fija mi wowo riba Dje. E sa tur cos. E conoce mi pasado, mescos cu e conoce mi presente y mi futuro. Mi tin di stop di complace hende y cuminsa complace Dios. Y mi speransa ta cu hasiendo esaki, Dios lo tin espacio pa move. Mi oracion ta pa cu mi obedencia mi pone un standard. Mi no ta prome hende cu ta move den obedencia toch (Hebr 11) Tur a move, sin conoce henter e picture y Dios a keda fiel na nan!!! A cumpli cu nan y a recompensa nan entrega!!!Mi kier termina cu Fil. 3:12-16 di cual versiculonan vooral versiculo15 ta mi speransa. cu cualkier cu tin un aktitud diferente, Dios lo revela esey tambe na dje. E promesa di e Spirito Santo ta duna na tur cu kere y ayera mi a lesa Lukas 11:13 caminda ta bisa cu nos Tata ta anhela pa duna nos e Spirito Santo na esnan cu pidiE!!! Cu e berdad aki ser revela na mi rumannan y cu nan curason sea humilde pa pidi Dios e don aki den fe! Mi ta convenci cu si esaki pasa lo tin un derame di Dios Su Spirito cu lo move Lavanttal! Esaki ta mi oracion. Amen.